Spergilkáls spagettí

Þetta heilnæma og litfagra pasta kemur frá Lucas Keller matreiðslumanni en hann lærði matreiðslu á Ítalíu og er mikill meistari í pastagerð. Hann kennir einnig reglulega pastagerð í Salt Eldhúsi og á og rekur veitingarhúsið The Coocoo's Nest ásamt eiginkonu sinni Írisi Ann, ljósmyndaranum okkar klára. Við fáum því reglulega góðar uppskriftir frá honum.

Sperigilkáls spagettí

350 gr heilhveiti spagettí

1 vænt spergilkálhöfuð

50 gr spínat

ólífuolía

salt

pipar

chili flögur

parmesan

sítróna

steinselja

Skerið toppinn af spergilkálinu. Skerið svo stilkinn neðst af en ekki henda honum. Skerið stilkinn í litla kubba og setjið til hliðar.

Sjóðið spergilkálið í söltu vatni í u.þ.b 3 mínútur og setjið svo í kalt vatn.

Blandið spínatinu og spergilkálinu saman. Auðveldast er að nota töfrasprota til að blanda því saman (ein lúka á móti einum haus af spergilkáli).

Blandið þar til úr verður mjúk mús, bætið næst við salti og pipar eftir smekk og einni matskeið af ólífuolíu og blandið svo aftur í nokkrar sekúndur.

Hitið pönnu með ólífuolíu, bætið spergilkálskubbunum úr stilknum út á og eldið í u.þ.b 5 mínútur. Því næst fer kryddið, þ.e.a.s. chili flögurnar, salt og pipar eftir smekk á pönnuna.

Bætið soðnu spagettíinu út á pönnuna með spergilkálinu og kreistið smá sítrónusafa út í.

Spergilkálsmúsinni er skipt á tvo diska og spagettíinu raðað í tvo fallega turna ofan á.

Stráið parmesan ofan á og smá sítrónuberki og njótið!

[caption id="attachment_605" align="aligncenter" width="640"]

Mynd: Íris Ann[/caption]