Íris Sveinsdóttir hárgreiðslumeistari og vinkona mín bauð okkur Kalla í mat í síðustu viku. Íris var um árabil gift írönskum manni og lærði að elda persnenskan mat eins og innfædd. Þvílík veisla sem manneskjan getur töfrað fram! Persneskur matur er dásamlega góður. Mikið af grænmeti, hvítlauk, túrmerik, jógúrti og framandi kryddum. Maturinn er gjarnan hægeldaður svo mikill tími fer í eldamennskuna en ji minn eini hvað þetta er bragðgott. Ég get eiginlega ekki lýst þessari sturluðu veislu en ef eitthvað þá myndi ég lýsa persneskum mat sem blöndu af grískum og indverskum mat. Stórbrotin skemmtun fyrir bragðlaukana! 

Istanbul market í Ármúla 42 selur skemmtileg krydd, osta og brauð sem gaman er að leika sér með í persneskri matargerð. Þeir selja einnig granateplasíróp sem er þó nokkuð notað í persneska kjúklingarétti.

Persnesk eggaldinkæfa

2016-02-15 13:20:00

Þessi kæfa er fullkominn forréttur eða smáréttur. Bragðmikil og einstaklega góð á brauð með ferskum kryddum, grænmeti og fetaosti. Ég grét smá þegar ég smakkaði þetta í fyrsta sinn.

Skrifa umsögn

Vista uppskrift

Prenta

Kæfa

1. 2 eggaldin
2. 4 geiralausir hvítlaukar
3. 100 gr lambagúllas steikt
4. 15 valhnetur
5. Salt
6. Pipar
7. Olía
8. Smjör
9. Túrmerik krydd
10. Sítróna
11. 2 litlar dósir tómatpúrra
12. 1/2 dl vatn
13. 1 dós sýrður rjómi

Meðlæti

1. Radísur
2. Fersk minta
3. Salat
4. Geita eða fetaostur
5. Gott flatt brauð

Leiðbeiningar

1. Afhýðið eggaldinin og setjið í matvinnsluvél ásamt steiktu kjötinu, 2-3 hvítlaukum og 15 valhnetum.
2. Setjið blönduna á heita pönnu ásamt olíu og tómatpúrrunni. Bætið vatninu við og látið malla við vægan hita í 30 mín.
3. Saltið, piprið, setjið 1/2 tsk af túrmerik og 1 msk af sítrónusafa út í og látið malla í klukkustund.
4. Á aðra pönnu eru settar 3 msk af smjöri og heill hvítlaukur sem skorin er í þunnar sneiðar. Steikið við háan hita þar til laukurinn verður stökkur og gylltur.
5. Þegar eggaldinkæfan er orðin meyr og dásamleg er henni smurt á flatan disk. Sýrðum rjóma er dreift yfir kæfuna og steikti hvítlaukurinn ásamt smjörinu kemur ofan á.
6. Smyrjið á gott brauð eða notið í vefjur!

Athugasemdir

1. Berið fram með góðu flatbrauði, radísum, salati, vorlauk, fetaosti (ókryddaður heill kubbur) og ferskri mintu. Það er líka örugglega æðislegt að setja maukið í vefjur.

Höfundur: Íris Sveinsdóttir

EatRVK https://eatrvk.is/